«Profeti ynë» rrëfen jetën e Profetit Muhamed, paqja qoftë mbi të, duke nisur nga historia e familjes së tij dhe rrethanat që paraprinë lindjen, për të vijuar me fëmijërinë, rininë, ardhjen e shpalljes dhe misionin profetik. Libri ndjek vështirësitë e besimtarëve të parë në Mekë, hixhretin në Medinë, formimin e bashkësisë myslimane dhe ngjarjet kryesore deri në ditët e fundit të jetës së Profetit. Përmes rrëfimit dhe referencave burimore, ai e njeh lexuesin me besimin, durimin, mëshirën dhe drejtësinë e tij, si edhe me marrëdhëniet me familjen, sahabët dhe shoqërinë.
